Want create site? Find Free WordPress Themes and plugins.

نوحه ۱

زبانحال حضرت ابوالفضل العباس (علیه السلام)

 

اَلده سو جامی تیکوب گوز آل حیدر مشکیمه

رحم ایدون اوخ وورمیون ای قوم کافر مشکیمه

ایچسه اصغر سلسبیل اولماز برابر مشکیمه

ناله ی اَلمائیله دولموش خیام طاهرات

شدّت سوز عطشدن عشّ ایدوب خوردا بنات

نه روادور چوللره دریا کیمی آخسون فرات

سو دِیوب یانسون باخاندا آل حیدر مشکیمه

ایلیوب سوز عطشدن آل علی قلبین کباب

بیر سودان چخمش بالیق تک اصغر ایلور اضطراب

اَلده بوش پستانلاری لای لای دیور بی کس رباب

ایلوری امّیدوار اوغلون او مادر مشکیمه

بسکه اوچ گوندور سوسوزدور آغلاماقدان خسته دور

گورسه هر کیم حالینی سویلر یقین جان اوسته دور

چون حیاتِ اصغرِ عطشان بو مشکه بسته دور

یِر یوزین دولدورسا سو اولماز برابر مشکیمه

العطش صوتین ایشتمورسوز اَیا قوم نفاق

ناله ی آل پیمبردن دولوب دشت عراق

بیر بو مشکه گوز تیکوب هشتاده دین عورت اوشاق

راضیم قربان اولا بو باش بو اللر مشکیمه

جسمیمه یوز مین وورولسا نوک پیکان راضیم

دیده ی پر اشکیمی دولدورسا گر قان راضیم

مشکیمه اوخ دگمسون ای قوم عدوان راضیم

اوخ دگوب اولسون سپر بو دیده ی تر مشکیمه

خیمه ده خوردا اوشاقلار جام اَلنده تشنه کام

گوز تیکوب میدانه گوزلوللر بو سو مشکین تمام

کیم ایدوب آب حلالی فاطمیّاته حرام

منتظردور اشکیله مملوّ گوزلر مشکیمه

یار و انصاری حسینون جان ویروب یکسر سوسوز

دوغرانوبدور قاسم و ناکام علی اکبر سوسوز

اولمیون راضی جماعت جان ویره اصغر سوسوز

بسته دور بو غملی چولده عمر اصغر مشکیمه

گوشه ی غربتده (سعدیِّ زمانم) اشکبار

اهل بیتیندن اوزاق، پوزقون، پریشان، دلفکار

انتقام ظالمه منده گوگلده انتظار

گوز تیکوبدور ظلمدن دلتنگ نوکر مشکیمه

شاعر : مرحوم حسینی سعدی زمان

 

 

نوحه محرم | دانلود نوحه | دانلود نوحه محرم | نوحه محرم ۹۶ | نوحه محرم ۱۴۳۹

نوحه ۲

رجز حضرت ابوالفضل العباس (علیه السلام) با عزاداران و دردمندان

 

من کیمم، من کربلانین تشنه لب سقّاسی ام

من کیمم،من ماسوانین تاج کرّمناسی ام

من کیمم، یئتمیش ایکی مَشکین سوسوز رؤیاسی ام

من کیمم، قاندان بزه نمیش نهضتین معناسی ام

من کیمم، معناده عاشورانین عاشوراسی ام

من کیمم،عطری یاییلمیش بوستانین یاسی؟ یوخ

من کیمم، یازدا گول آچمیش غنچه نین احساسی؟ یوخ

من کیمم، نازدان سوزولموش گوزلرین الماسی؟ یوخ

من کیمم، زاهدلرین واعظ لرین عباسی؟ یوخ

من فقط دیلسیز لرین، دیلسیز لرین عباسی ام

من کیمم، رؤیا، سوسوز دریالرین آئینه سی

من کیمم، دریا، شیرین رؤیالرین آئینه سی

من کیمم، قولسوز، کسیک طوبالرین آئینه سی

من کیمم، ای وای حسینیم والرین آئینه سی

من سوسوزلارین حسینیم وا، حسینیم واسی ام

من کیمم، انّا فتحنا شهرینین دروازه سی

من کیمم، نصر و من الله شرحنین شیرازه سی

من کیمم، مین دورد یوزایللیک کهنه عشقین تازه سی

من ابوالفضلم قوجا عشقین جوان سیماسی ام

من ابوالفضلم تیکیب اهل حرم گؤز مشکیمه

دولدوروب آب فراتین حسرتی کؤز مشکیمه

نیله رم سالسا سوسوز قیزلار سودان سؤز مشکیمه

دولدورام گؤز یاشیمی اوندا گره ک اؤز مشکیمه

من ابوالفضلم سوسوز آهولرین سقّاسی ام

من ابوالفضلم منی آهیله سسله های وئریم

هر نه ایسترسن دئنن بیر یول حسینیم وای وئریم

بیر باخیملیق اولدوز ایسته مین گونش لیک آی وئریم

بیر سئخیم گوز یاشی تؤک عشقیمده سئل سئل پای وئریم

من ابوالفضلم کرم طومارینین امضاسی ام

من ابوالفضلم ویروب چوخ یاره لر نوفَل منه

خوش گونومده چوخ دییردی چوخ لاری گَل گَل منه

ایندی کی قلبیم سینیبدور قالمیوبدور اَل منه

اوخ شماتت دن یاغاندا گؤز تیکر اوّل منه

من ابوالفضلم بلا لولاسینون معناسی ام

من ابوالفضلم گوزوم اوخلاندی مولا جان دئدی

داغ داغیلدی دامن صحرایه، صحرا جان دئدی

من دئدیم یاندیم آنا، سسله ندی زهرا جان دئدی

بیر جهان جان سیز ییخیلدی بیر جهاندا جان دئدی

من ابوالفضلم حسینین دوغرانان اعضا سی ام

من ابوالفضلم منی تشنه دوداخلاردان سوروش

من ابوالفضلم منی یانمیش بولاخلاردان سوروش

من ابوالفضلم منی سؤنموش چیراخلاردان سوروش

من ابوالفضلم منی قولسوز بوداخلاردان سوروش

من سؤزولموش گوزلرن «فریاد» واویلاسی ام

شاعر : اسد نیکفال اردبیلی (فریاد)

 

 

نوحه محرم | دانلود نوحه | دانلود نوحه محرم | نوحه محرم ۹۶ | نوحه محرم ۱۴۳۹

نوحه ۳

زبانحال حضرت ابوالفضل العباس (علیه السلام)

 

اهل کین سو مشگین الده ایلدی بهانه قارداش

اولدی پیکریم سراسر اوخلارا نشانه قارداش

سو گتورماقا خیامه سعی و همّتیم چوخ اولدی

یتمَدیم ولی مرامه نقشۀ دلیم پوزولدی

اللریم سودان بوشالدی جام دل غمیله دولدی

دوندی اشگ چشمیم آخر گوزلریمده قانه قارداش

هر قدر یارا یتیشدی جسمیمه دُؤزوب دایاندیم

ووردیلا اوخی اوخ اوستن اهل کینه سهل ساندیم

قولّاریم بدندن اولدی قانه ظلموله بویاندیم

ایلدیم گینه تحمّل جور کوفیانه قارداش

من سویا اولاندا مالک، صبریمی سو موجی آلدی

تا سویا الیم یتیشدی درد و محنتیم چوخالدی

گرچه او ایکی اُووج سو گوتدوقوم یرینده قالدی

باعث اولدی بو جسارت نچه ترجمانه قارداش

سینم اوسته یر ویرردوم شوقیله گلنده هر اوخ

بال و پر آچوردی جسمیم ذوقدن آچاندا پَر اوخ

اوزگه وجدیله اوچوردوم دگمَسیدی مشگه گر اوخ

حیف اولا یتَنمدیم من بیرده آشیانه قارداش

نیزه و قلج یاراسی جسمیمی ایدوبدی گُل گُل

پیکریمده باش آچوبدور هر یارا اولوبدی بیر گُل

باش باشا چاتوبدی اوخلار سینه‌ده بسان سنبل

خاریله دونوب وجودیم طرفه گُلستانه قارداش

نه بو حالیده اورکده فکر سوزش یارام وار

نه گوگولده اوز خیالیم وار نه فکرت آنام وار

قلبیده سنون ملالون هر قدر که من وارام وار

قویدولار سنی کومکسیز، تُف بو شامیانه قارداش

نچّه سنگدل ستمگر نعشیمی آلوب آرایه

نیزه‌پوش اولوبدی جسمیم سوزش آرتیرور یارایه

دفع ظلم ایدم الیم یوخ باری سن یتیش هرایه

من بو لشگرین الیندن گلموشم امانه قارداش

کاسه سریم اولوبدور بیر عمودیله شکسته

اولمیوبدی تار عمریم دست ظلموله گُسسته

قورخورام که ای امیدیم سن گلینجه باشیم اوسته

خار الیله دونسون آخر گلشنیم خزانه قارداش

من فدای راه دینم ای منیم امیدگاهیم

شاهدیم ایکی قلم قول بیرده اوخلی سجده‌گاهیم

قانلو مشگ قانلو بیرق صدق عرضیمه گواهیم

احتیاج یوخدور اوزگه شاهد و بیانه قارداش

سن تواضع ایله شاها قیل‌گیلن قبول زحمت

گل اوزون آپار سو مشگین ای مه سپهر رحمت

پاره پاره مشگیمی گر گورسه اهل‌بیت عصمت

اودلانوب باتان دلیله اود سالار جهانه قارداش

دین یولوندا اهل کیندن هر قدر ستم یتیشدی

نه علمدن ال گوتوردوم قاشیمه نه خم یتیشدی

بیرقیم یاتاندا بولدون سن منه نه غم یتیشدی

بار محنتیله دوندی قامتیم کمانه قارداش

سن شها بولورسن (عاصی) تکدی یوخدی دادخواهی

هر طرفدن اهل و نااهل تَکلیوب بو روسیاهی

بیر سنه اولوب امیدی ای هامی جهان پناهی

هر ایکی جهان تیکوب گوز بیر بو آستانه قارداش

شاعر : مرحوم عاصی

 

 

نوحه محرم | دانلود نوحه | دانلود نوحه محرم | نوحه محرم ۹۶ | نوحه محرم ۱۴۳۹

نوحه ۴

زبانحال حضرت ابوالفضل العباس (علیه السلام) به حضرت امام حسین (علیه السلام)

 

قارداش حسین درک ایت منی وقت حمایتدور منه

قولار گیدوب باش یاره لی اولماق سعادتدور منه

اولدوم مصمم ویرماقا بو چولده قارداش امتحان

باشدان گیچوب اوز عشقیمی عالملره ویردیم نشان

گل گل یوزون بیرده گوروم تا من ویروم اسوده جان

اخر نفسده آرزو فیض زیارتدور منه

وقاص زاده باشیمی کسما قلقا فرمان ویرور

بسکه ووروبلار اوخ قلج جسمیمده یاره قان ویرور

قارداش یارالی قارداشین دلدن دوشوبدور جان ویرور

سینم باتوب گلمور سسیم وقت شهادتدور منه

اللرده نیزه دوره می ایلوب احاطه بو صفوف

بیر دسته سی خنجر ووران بیر دسته سی تیر و سیوف

عرض ایلدیم گل یانیمه عفو ایله ای شاه رئوف

عذر ایستورم بو سسلماق چوخ چوخ جسارتدور منه

بو قوم کین ایتدی کمین قولاریمی ایتدی قلم

فرمایش ایت گوز تیکمسون بیرده یولا اهل حرم

دوشسون سو فکریندن قیزین مشک اوخلانوب یاتدی علم

اوخلانماقی سو مشکیمین اسباب خجلتدور منه

باشیم یارالی قانیله چشمیم دولوب یا سیدی

باد ستمله گلشن عمریم سولوب یا سیدی

تاخیریوه بلمم سنون علت نولوب یا سیدی

سنسیز یتوب هر غصه و اندوه و محنتدور منه

بو قوم کافر جسمیمی ایلوب ستمله نیزه پوش

بیر پر شکسته قوش کیمی جسمیم قالوب یرده خموش

گل گور علمدارین اولوب نه ظلم بی پایانه توش

تشریف فرما اولماقین شان و جلالتدور منه

بیر ایله حاله دوشموشم شامه دونوبدور گوندوزوم

یوخ رحم ایدن احوالیمه بلمم نه نوعیله دوزوم

بو قانلی تپراق استه من گیتدی سورونماقدان یوزوم

یاره ووران رحم ایتمین اهل شقاوتدور منه

خنجر دمینده دمبدم گلم فغان و داده من

سن باشیم استه گلمسن باش ویرمرم جلاده من

اولم رضا چوخ یالواروم بو فرقه بیداده من

جلاد الینده قالماقیم بیحد حقارتدور منه

شاها (حسینی) صدقیله اغلور غمینده صبح و شام

اما فشار ابتلا چوخ ایلیوبدور تلخکام

عباس الیله ایله تیز خوشحال مقضی المرام

بیر مختصر لطفون اگر اولسا کفایتدور منه

شاعر : مرحوم حسینی سعدی زمان (از اشعار چاپ نشده)

 

 

نوحه محرم | دانلود نوحه | دانلود نوحه محرم | نوحه محرم ۹۶ | نوحه محرم ۱۴۳۹

Did you find apk for android? You can find new Free Android Games and apps.